ಹಿನ್ನಲೆ

ಮಣಿಪಾಲದಲ್ಲಿ ಅಭಿವೃದ್ಧಿ ಆರಂಭವಾಗಿ ಪ್ರಥಮ ಹಂತದ ಉದ್ಯೋಗ-ವಾಸ್ತವ್ಯ ಆರಂಭವಾದ ಬಳಿಕದ ದಿನಗಳಲ್ಲಿ ಪರಿಸರದಲ್ಲಿ ಕಂಡು ಬಂದ ಪ್ರತ್ಯಕ್ಷ ಮತ್ತು ಪರೋಕ್ಷ ಘಟನೆಗಳೇ ಕಾರಣವಾಗಿ ಪೈ ಬಂಧುಗಳ ಕೇಳಿಕೆಯಂತೆ ಮಣಿಪಾಲದ ಇಂಜಿನಿಯರಿಂಗ್‌ ಕಾಲೇಜನ ಬಳಿ ಗೋಳಿ ಮರದಡಿಯಲ್ಲಿ ಶ್ರೀ ಬಬ್ಬುಸ್ವಾಮಿ ಮತ್ತು ಪರವಾರ ದೈವಗಳನ್ನು ನಂಬಿ ಪೂಜಿಸಲು ಆರಂಭವಾಯಿತು. ಮುಂದೆ ಮಣಿಪಾಲದ ನಿವಾಸಿಗಳು ವಂತಿಗೆ ನೀಡುತ್ತಾ ಸಂಕ್ರಮಣಪೂಜೆ, ವಿಶೇಷ ದಿನಗಳಲ್ಲಿ ದರ್ಶನ ಸೇವೆಯನ್ನು ನಡೆಸುತ್ತಾ ಶ್ರೀ ಬಬ್ಬುಸ್ವಾಮಿಯ ಆರಾಧನೆ ಜಾತಿ ಬಾಂಧವರಿಂದ ಆರಂಭವಾಯಿತು. ಮಣಿಪಾಲ ದಾರಿಯಾಗಿ ಎತ್ತಿನಗಾಡಿಗಳಲ್ಲಿ ಸರಕು ಹೇರಿಕೊಂಡು ಉಡುಪಿ ಪೇಟೆಗೆ ಬರುವ ಹಾಗೂ ಕಾರ್ಕಳ ಮೂಲಕ ಘಟ್ಟದವರೆಗೆ ಹೋಗುವವರಿಂದ ವಂತಿಗೆ ಪಡೆದು, ಮಣಿಪಾಲದಲ್ಲಿ ವಾಸ್ತವ್ಯವಿರುವವರಿಂದ ಮತ್ತು ಪೈ ಬಂಧುಗಳಿಂದ ಸರ್ವ ಸಹಕಾರ ಪಡೆದು ಎರಡು ವರ್ಷಕ್ಕೊಮ್ಮೆ 'ಸಿರಿಸಿಂಗಾರದ ನೇಮ'ವನ್ನು ಶ್ರೀ ಬಬ್ಬುಸ್ವಾಮಿ ಮತ್ತು ಪರಿವಾರ ದೈವಗಳಿಗೆ ನಡೆಸುತ್ತಾ ಮಣಿಪಾಲವೂ ಶ್ರೀ ಬಬ್ಬುಸ್ಥಾಮಿಯ ಜಾಗೃತ ಸ್ಥಾನವಾಯಿತು. ಮುಂದಿನ ದಿನಗಳಲ್ಲಿ ಮಣಿಪಾಲದ ಪೈ ಬಂಧುಗಳು ಮಣಿಪಾಲದ ನಿವಾಸಿಗಳಾಗಿರುವವರನ್ನು ಎಲ್ಲಾ ಸೇರಿಸಿ ಒಂದು ಸಮಿತಿಯನ್ನು ರಚಿಸಿ ಶ್ರೀ ಬಬ್ಬುಸ್ವಾಮಿ ಮತ್ತು ಪರಿವಾರ ದೈವಗಳಿಗೆ ಹೂನೀರು, ಸಂಕ್ರಮಣ ಪೂಜೆ, ದರ್ಶನ ಸೇವೆ ಮುಂತಾದ ವಾರ್ಷಿಕ ಪಂಚ ಪರ್ವಗಳು ಮತ್ತು ವಿಜೃಂಭಣೆಯ ನೇಮ ನಡೆಯುವ ವ್ಯವಸ್ಥೆಯಾಯಿತು.

ಈ ಆರಂಭದ ಕಮಿಟಿಯನ್ನು ರಚಿಸಿ ಸುವವಸ್ಥೆಯನ್ನು ನೆಲೆಗೊಳಿಸಿದ ಮಹನೀಯರು ವಿಧಿವಶರಾದ ಬಳಕ ಸ್ವಲ್ಪ ಕಾಲ ವಾರ್ಷಿಕ ನೇಮ ನಡೆಯಲಿಲ್ಲ. ಆದರೆ ಇತರ ಪೂಜೆಗಳು ಸಾಂಗವಾಗಿ ನೆರವೇರುತಿದ್ದುವು. 1990ರಲ್ಲಿ ಮಣಿಪಾಲದ ಭಗವತ್ಬಗ್ತರೆಲ್ಲ ಮತ್ತೆ ಬಬ್ಬುಸ್ವಾಮಿಯ ಪ್ರೇರಣೆಯಂತೆ ಒಂದಾಗಿ ಸರ್ವಜಾತಿಯವರನ್ನು ಸೇರಿಸಿಕೊಂಡು ಸಮಿತಿಯೊಂದನ್ನು ರಚಿಸಿ ಕಾಲಾವಧಿಯ ಸೇವೆ ಹಾಗೂ ನೇಮ‌ ನಡೆಯಿತು. 1991ರಲ್ಲಿ ಪೈ ಬಂಧುಗಳು ದೈವಸ್ಥಾನವನ್ನು ಕಟ್ಟಿಕೊಟ್ಟರು. ಬ್ರಹ್ಮಕಲಶಾಭಿಷೇಕ ಮಾಡಿಸಿ ನೇಮವನ್ನು ಸಮಿತಿಯವರು ನಡೆಸಿದರು. ಬಳಿಕ ಪ್ರತೀ ವರ್ಷ ಅನ್ನ ಸಂತರ್ಪಣೆಯೊಂದಿಗೆ ನೇಮ ಹಾಗೂ ಶ್ರೀ ಬಬ್ಬುಸ್ಥಾಮಿಯ ಸಂಕ್ರಮಣ ಪೂಜೆ, ದರ್ಶನ ಸೇವೆಗಳು ಸಂಭ್ರಮದಿಂದ ನಡೆಯಲಾರಂಭಿಸಿತು.